غلط كبير
غلط كبير اوى لما تشاور لحد على مفاتيح ألمك و وجعك و تتخيل انه (مش) هيستخدمها كويس معاك .. أقصد ضدك
!!!حتى لو كان الحد دا من القريبين و المُحبين كمان
أيوة حتى لو كان كدا
عشان ببساطه عُمره ما هيحبك أكتر من نَفسه ولا حتى قد ما بيحب نَفسه
و نَفسه فى وقت من الأوقات هتبقى عايزاك تمشى معاه فى طريق مُعين
فلو حاولت بقى تمشى فى أى طريق تانى , هتلاقى نفسك بتتشد على الطريق بتاعه
و المشكله برده مش هنا
المشكله الكبيره فعلا انه مش هيحاول يشدك معاه بأى طريقه تكلفه وقت أو مجهود
طالما فى طريقه سهله جدا و مُتاحه وقدمتهاله أنت - بعبط - على طبق من دهب
عارف ايه هى؟؟
أيوة بالظبط كدا ..هى مفاتيح وجعك دى ... هى أول حاجه هيضغطلك عليها و يمسكك منها
فنصيحه - ال يعنى انا اهل للنصيحه,, بس معلش برده هنصح - تانى مره اوعى تآمن و تكشف عن أماكن ألمك و وجعك
بالذااااااااااااااات للقُريب منك ..لأن البعيد أصلا عمره مهيقرب لمسافه كافيه انه يوجعك منها
القُريب بس هو اللى بيعرف يعمل كدا .. و أوعى تفكر جدلا انه هيطببلك أوجاعك دى او حتى يخاف عليها زيك
و أوعى كمان تفتكر من كلامى أنى بقولك القريب منك دا وحش و مبيحبكش
أبدااا ,دا هو حلو و كويس و جميل و بيحبك قوى كمان
بس أسمحلى يعنى اذا انت عبيط و بتديله فرصه دهبيه كدا ,, متطلبش منه هو كمان يبقى عبيط زيك و يضيعها
5 comments:
أخيرا كتبتي حاجة جديدة
سؤال كمان بيطرح نفسه بشددددة .. لما واحد يستغل مفاتيح اوجاعي بالشكل دة يبقي معناها حاجة من اتنين .. يإما انا مخدتش بالي انه "الشخص دة" ماينفعش خااااااالص أقوله حاجة .. أو اني اسأت اليه بطريقة ما خلته يعمل كدة (طبعا دة مش مبرر له)
كلامك جميل بس ايه الحل .. هاحكي الآلامي لمين كدة .. ولازم الواحد يحكي .. على الاقل عشان الآلامه ماتزيدش ناهيكِ عن علاج الآلام نفسها بمجرد الكلام مع اللي بنحبهم وبيحبونا .. وبعدين لما انا احكي هو كمان هيحكي عن الآلامه وهنتبادل مفاتيح الآلام .. يمكن نقول مثلا ان الواحد مايحكيش للي بيسمع من غير ما يشاركنا بمفاتيح أوجاعه هو التاني .. كدة ممكن أقولك اه .
السؤال اللي بيطرح نفسه أصلا .. احنا ليه بنشاور لحد على مفاتيح الاوجاع ؟؟ .. عشان ماينفعش تتساب كدة .. لازم نشاور .. لازم نتكلم ونقول .. بس مش لأي حد طبعا مهما كان قريب .. لازم يكون هو التاني عنده استعداد لأنه يشاركنا الآلامه وفي نفس الوقت مش الشخص اللي يستغل المفاتيح دي تحت أي ظرف .
نقطة جميلة جدا بس فيه نقطة ان الشخص ده لو استغل مفاتيح اوجاعي علشان يضغط عليا يبئى الغلط غلطي انا من البداية اصلا اني اخترت شخص زي ده اشاركه بمفاتيح اوجاعي و اظن ان الواحد لازم يكون عنده نظره للشخص اللي بيشاركه اوجاعه ان مش اي حد اشاركه الالامي و و مشاكلي حتى لو كانوا من اقرب الناس ليا
يعني بمعنى اصح حتى اصدقائي و المقربين ليا مش كلهم اقدر اشاركهم بأوجاعي و مشاكلي الشخص الوحيد اللي لازم اشاركه هوا الشخص اللي فعلا متأكد من هوا شخص كويس هيقدر ينصحني و يمسح عني اوجاعي
فالنقطة هنا ان اذا الشخص ده استغل حاجة زي كدا يبئى الخطأ خطئي اني اخترت الشخص ده اصلا من البداية و بعدين فيه نقطة كمان لو تسمحيلي اني مش عبيط اني اشارك اشخاص بمشاكلي و اوجاعي بس هكون عبيط فعلا لو اديت الفرصة لبني ادم يضيع الثقة اللي انا اعطيتوا اياها و يستغل اللي عرفه علشان يوجعني اكتر
بس ده كل اللي كنت عايز اقوله و و بوست جميل قوي علشان بيناقش نقطة مهمة
تحياتي لحضرتك
سلام
اكيد الواحد لازم يبقي له حد يعرف يقولله حاجة من غير خجل ومن غير خوف وبثقة انه امن
لازم
تحياتي
اعتقد لو حد قريب فعلا
و بيحبك زي ما بتحبيه
يبقي برضو كمان حيديكي مفاتيحه
و بكدا العمليه حتكون متعادله...اما لو مداكيش مفاتيحه ...يبقي هو مش قريب ...
انا مشكلتي بقي ان مفاتيحي معلقها في شريط في عنقي ...اي حد غريب او قريب عارفها و بيعرف يستعملها كويس
بس انا لفشلي مرارا و تكرارا في اخفاءها
تأقلمت مع الوضع دا ...
عااااااااااا.. شكلك أتوجعتي أوي يا بنتي .. ربنا يبعد عنك الناس اللي مش كويسي .. (دي الدعوة الحلوة
ملحوظة : بفر أوي لما بتحدثي المدونة.. ما تتأخريش عننا بقى على الأقل علشان تفرحينا
:)
سلامات
Post a Comment