ياللى أنت روحى فيك .. لو تراضينى

بالحياه أفديك .. دا أنت نور عينى

النور مكانه فى القلوب

هل من الممكن أن يتسامى الانسان ؟ و يتحول من ماده على الارض لماده تانيه خفيفه بتطير مثلا ؟؟
و يشعر ان روحه تحلق عاليا فى السماء ,, فى حين انه ليس الا ماده جسد على الارض ؟؟

بصراحه فكره التسامى هى الشئ الوحيد اللى قدرت أفكر فيه و أنا بسمع النور مكانه فى القلوب .. وقتها حسيت انى قدام بحر بالوانه الزرقا اللى بتاخد لبعيييييييييييد .. تخيلت انى سمعت صوت الموج اللى بعشقه ,, عشان بيدى روحى طاقه عجيبه .. حسيت بنور و امل بيدخل جوايا .. مممممممممم مش عارفه اقول ايه يعبر .. لكن اكيد هاقول شكرا للفن الذى يجعلنا نتسامى .. و شكراً لله الذى منحنا الاحساس بالفن الجميل

***

النور مكانه فى القلوب .. احضن خيوط شمس الغروب

اللهم اجعل في قلبي نورا يارب .. وفي لساني نورا .. واجعل في سمعي نورا
واجعل في بصري نورا . واجعل من خلفي نورا . ومن أمامي نورا .. اللهم اعطني نورا
اللهم اجعلي نورا .. اللهم اجعلني نورا

يا تكون قد الحياه يا تعيش وحيد وسط الدروب

اليأس ضعف وخوف جبان لكن الامل يفتح ببان

يارب لا تجعلنى أيأس من رحمتك ابدا فرحمتك وسعت كل شئ و افتحلى كُل ابواب رحمتك يارب

يا تكون قد الحياه يا تعيش وحيد وسط الدروب

المس خضار الشجر,, حس بضياء القمر,, انقش قلوب على الحجر,, على شىء ما تندمشى

يارب اجعلنى جميله الروح .. امنحنى عيناً جميله ترى الجمال

لما بهوا تعديه امشى الطريق امشى العمر ايه يرويه غير قلب ما يخافشى

النور مكانه فى القلوب احضن خيوط شمس الغروب

يا تكون قد الحياه يا تعيش وحيد وسط الدروب

فيه ناس كتير ترضى المصير .. وناس تشوف بضمير ضرير

يارب .. أحفظلى ضميرى نقى حتى الاقيك
يارب .. ضميرى هو كُل ما أملك

يا تكون قد الحياه .. يا تعيش وحيد وسط الدروب

حلى مرار الايام لسه الحياه قدام .. قوم لون الاحلام واوعا ما تضحكشى

يارب باركلى فى عمرى الآتى .. باركلى أحلامى الطيبه

جسدك فى قلبه الروح .. تداوى كل جروح .. بالسر اوعا تبوح .. واياك ما تحلمشى

ربنا يطمنا عليك

قلقانه عليك قوى اليومين دول يا حبيبى

....

شايفاك بتضغط على نفسك قوى , و بتبذل مجهود زياده جداا

بتنام قليل و على طول بتفكر .. و مشغول البال ,, و مش

عاوز تحكى على سبب قلقك

كل شويه اتصل بيك بأى حجه عشان اطمن عليك ... تقولى انا بخير , لكن صوتك الهادى قوى بيقولى فى شئ شاغلك وتاعبك ... أنا متاكده من احساسى ... مش على طول تقولى انتى اكتر واحده بتحسى بيا ...

ربنا يروق بالك و يطمنا عليك

أنا عندى حنيــــــــــــن ... ما بعرف لمين

اول مرة اسمع الأغنيه دى لفيروز .. و بما انى كنت بسمعها فى وقت هادى .. كنت قدرا محاطه بوقت من الفراغ ,,ادانى فرصه اركز معاها قوى

انا عندى حنين مابعرف لمين

ليليه بيخطفنى من بين السهرانين

بصير يمشينى لبعيد يودينى

مابعرف لمين مابعرف لمين

****

نفسى افهم ليه اسمع كلام زى ده فى نفس ذات الوقت اللى بكون فعلا حاسه بحنين و افتقاد لناس كتييير ,, زى اما حد يعمل حاجه غلط بينه و بين ربنا و يقوم يسمع الآيه الكريمه " أما آن للذين آمنوا أن تخشع قلوبهم لذكر الله "طبعا حاشا لله انه يكون فى حاجه زى كلام ربنا سبحانه و تعالى ,, بس انا بحكى على فكرة الومضات القدريه او السينس او الستارزاللى بتظهر فى حياتنا فى اوقات غريبه ,, أيا كان بقى

عديت الاسامى .. ومحيت الاسامى

ونامى يا عينيى .. اذا راح فيك تنامى

وبعدو ها الحنين من خلف الحنين

بالدمع يغرقنى لاسامى المنسين

تاعرف لمين ومابعرف لمين

*******

طيب و اذا كانت عينى حتى لما بتنام بتحلم بالاسامى و أصحاب الأسامى ... وساعتها بعرف .. و دايما بحلم انى ببكى ,, و الله دايما بحلم انى ببكى على صداقه كانت فى وقت من الاوقات صداقه عمرى .. و دايما أحلم ان انا و صاحبتى بنتعاتب و بنصفى الخلاف اللى مكانش بينا أصلا ... بس بسببه مرت اكتر من سنه من غير مانتكلم و لاحتى نسأل على بعض ..........

انا ياخوفى لتكون بعدك حبى ... ومتهيا لى نسيتك وانته مخبا بقلبى

هو لما ببقى بتجنب التفكير تماما فى واقع اننا اصبحا اغراب عن بعض .. و كل ما تيجى السيرة مقولش غير مش عاوزة اكلم و مش عاوزة افتكر .. .. وبرده يفضل دايما صاحبى الحلم ده اللى بيدور حوالين انى فى بيتكم و معاكم و بنتكلم و نتصافى .. يبقى معنى كده انك لسه فى قلبى ؟؟؟ يعنى انا لسه فى عقلى الباطن مصرة انى منساش برغم انا بقالى حياه و اصحاب و دنيا تانيه .؟؟؟

طيب و ماله ..ما انا غصب عنى برده ..اصلى لو نسيت كل حاجه مش هعرف انسى يوم ماحصل خلاف بين عندنا و عندكو و جرينا انا و انتى على التليفون و اتفقنا انه مهما حصل بينهم ملناش دعوة و مش عاوزين نخسر بعض .. .. مش هعرف انسى بيتى و اهلى .. .. دا انا لو مكنتش عارفه اذاكر فى بيتنا .. احول عندك .. مليش دعوة انتى بتعملى ايه و لا فين ..ماهو انا فى بيتى بقى ..مش هنسى انه اى مناسبه تجمع العيله عندكو قرايبكم كانو بيسالوا عليا انا .. ماهم اتعودا يشوفونا مع بعض عندكو ولو مكنتش انا عندك يبقى انتى عندى او احنا الاتنين خرجنا ..... أصلى مش هعرف انسى عمر من عمرى

تاعرف لمين .. وما بعرف لمين

لكن انا خلاص بقيت عارفه .. و هفضل محافظه على الحنين ده فى مكان آمن فى قلبى ..ماهو محدش بينسى اصحاب عمره , و ان قدر لينا نتقابل فى يوم ونتكلم , هحكيلك على الكلام ده ..عشان انا عارفه ان عمرك ما هتقرأيه ..ما انا عارفه صاحبتى ,, عمرك ما كنتى غاويه قرايه .. انا دايما أقرأ و احكيلك .. و هحكيلك باذن الله.