Wednesday, March 21, 2007

الحياه سنيما ..... و حاول تفتح عينيك

مشهد -1- من داخل نفسى
النهارده اتفاجأت انها نهايه الاسبوع ... من غير ما انتبه .. مع انى دايما كنت استنى آخر الاسبوع عشان
بيجى و معاه .. المفاجآت أحيانا .. مُتعه الاجازة أحيانا .. لقاء الاصدقاء فى أحيان أخرى ...لكن
واضح ان حتى التفاصيل الصغيرة اللى بتدى للحياه معنى و بتكسر الروتين شويه ... مش مضمون استمرارها .. او مش مضمون احساسنا بجمالها ....
**************
مشهد -2- قُريب منى
فى الفترة الاخيرة قربت جدا من تحقيق حلمها اللى انتظرته كتيييير جدا ... و بعد ما اصبحت قاب قوسين او ادنى منه .. و خلاص هتمسك سعادتها بايديها .. بصت لاقيت نفسها ماسكه القلق و الخوف من بكره .... ونظرات التحذير بتحاوطها من كل حاجه و كل حد حواليها ,, نفسى جدا أشوفها فرحانه .........
أصل الفرحه دى بتعدى .. نفسى أفرح أنا كمان
**************
مشهد -3- مشهد خارجى
هى : يا الله على غروره يا ناس ... عمره لا بيسلم ولا بيكلم ... لا و كل المظاهر المحيطه بيه بتساعده على كده
بس ولو ... بكره الغروووووووووور انا ... مهما يكون
هو : لو سمحتى هو ممكن تبقى فى المجموعه بتاعتنا ... مين ... أنا؟؟
ايوة انتى بتكلمى صح .. اسمعوها يا جماعه عندها وجهه نظر فى الموضوع
هى : طيب انا افكارى كده ,, عايزة كل واحد يتصرف بالشكل ده .. هيناسبكو كده ؟
.. هو : تمام
هى : أنا مديونالك بالاعتذارعن كل لحظه شوفتك فيها حد غيرك
عشان انت مش مغرور فى الحقيقه .. لا .. مش مغرور أبدا ً
****************

10 comments:

smraa alnil said...

مش عارفة اقولك ايه
بس احيانا بننخدع في اللي ادامنا بنبص ليه بنظرة معينة وبالوقت بنكتشف العكس


انا كما نفسي افرح اوي

Great wishes said...

(الحقيقه ياسمراءاحنا مش ( أحيانا
بنتخدع فى اللى ادامنا ,, احنا كتييييييييييير بنتخدع و الاصعب لما نتخدع بسبب افكارنا المُسبقه .. مش بسبب تصرفات الطرف الآخر

و ربنا يفرحنا كلنا و هو قادر على كل شئ سبحانه و تعالى

Eric Matt said...


ظريف اسم البلوج ويارب تحققي أمانيكي فيها كلها يا رب

ومبروك ليكي تاني عليها

أما بقا الحنين لحد فيا رب ما تبعد حبايبنا عنا يا رب

عايز بقا اعرف حاجتين

أول حاجة انت ايه اللي خلاكي تقولي عليه مغرور؟ مجرد عدم اشراكك ليه في الحوار؟

طيب و الحاجة التانية
ايه اللي بيربط المشاهد دي مع بعض؟ ايه اللي خلاها تخطر على بالك؟

تحياتي من ماناساس البلد

Great wishes said...

ايه ده - أنا لسه كنت بتمشى فى المدونه بتاعتك النهارده - الافى عندى فى نفس ذات اليوم ... يا دى النور يادى النور.

أول حاجه الله يبارك فيك يارب , و اللهم آمين على دعائك بتحقيق الامنيات الحلوه يارب.

أما بالنسبه للاسئله المطروحه :
1- هو مين اللى قال أصلا انى انا اللى قلت عليه مغرور .. تؤتؤ ..دى هى .. (ضحكه خبيثه)
لكن ممكن أفتن عنها واقول .. لا مش عشان عدم الحوار .. هو للاسف حكم غلط مبنى على كام حاجه سطحيين للغايه و غلط نحكم على شخص كامل بكام نقطه فييه لكن نقول ايه ... عقد نقص بقى

2- بالنسبه للمشاهد بيجمعهم عامل الزمن ... مروا امامى فى فترات متقاربه قوى و كل مشهد ترك انطباع فى نفسى ...بس كده

متشكره تانى على تعليقك و امنياتك الطيبه , جزاك الله خيرا عنى

david santos said...

Hello!
Thank,s for you work and have a good weekend

heba said...

أحلى جملة اللي انت قلتيها في المشهد من داخل نفسي " حتى التفاصيل الصغيرة بتدي للحياة معنى" الكلام ده صحيح لأنك لو بصيت للحياة بشكل عام أو ليومك اللي انت بتقضية هتلاقيه مليان ملل وأرف وزهق لكن ممكن حاجة صغيرة تحصل فيه هي اللي تخليه يوم جديد وجميل ان شالله تكون فكرة جديدة أو تفكير في شيء ما أو حاجة حلوة خطرت على بالك سواء خيالية أو حقيقية
أما الفرحة فهي تبدو في بعض الأحيان بعيدة المنال فيارب تفرحي وهي تفرح وكلنا نبقى فرحانين آآآآمين
أنا مريت بموضوع الحكم على الأشخاص بشكل خارجي كده ولقيت نفسي غلط ودايماً بفتكر المثل اللي بيقول " لا تحكم على الجواب من عنوانه أو لا تحكم على الكتاب من غلافه .. حاجة زي كده" بس ساعات إحساس الواحد بيصيب فخليها تأجل الحكم شوية وتحتفظ بإحساسها لغاية ما تحصل حاجة يا تأكده يا تنفيه
وسلامي ليك

Great wishes said...

David Santos

Thanks, n wish u da same.


--------

shams

أيوة يا شمس ..هى دايما التفاصيل
هى اللى بتدى معنى للحياه كلها فى الحقيقه ..هى اللى بتخلينا نقرى الناس اللى ادامنا ..
و بالنسبه للفرحه مهما بعدت هفضل مؤمنه انها جايه باذن الله فى الوقت الصح ,, و ربنا يفرحنا كلنا يارب
و حاضر هخليها تأجل حكمها
و الله يسلمك يا جميل .. نورتينى و الله

حصان بري said...

مشهد 1:الصوره لذيذه بجد وهي اللي جابتني هنا

مشهد 2: هتمسك سعادتها بايديها
للدرجه دي؟
عموما دعوات مصر كلها معاها

مشهد 3: مشهد خارجي (هنمشيها خارجبي)
بقي قالها انتي عندك وجهه نظر
قالتلهم اتصرفوا كده
قالهم اسمعوا كلام الباشا
بقي مش مغرور
يحبوا في بعض هم ويبهدلوا الشعب معاهم

كيب جويبج بجد المدونه كلها حلوه وبسيطه

Great wishes said...

حصان مصرى

حاسه بروح مشاكسه كده فى تعليقاتك ... لكن عاجبانى

اولا متشكره على اعجابك

ثانيا بالنسبه للسعاده اللى هتمسكها بايدها .. كل الحكايه ان حلمها فى السعاده بسيط قوى و بالتالى لما هتقرب منه مش هيبقى اكبر من كف ايديها و هتمسكه باذن الله.

تعليقك على المشهد التالت فطسنى من الضحك ... بقى هتمشيها خارجى .. لا ناصح .. و بعدين انت ايه اللى مزعلك بس انهم يسمعوا كلام الباشا .. ثم انك بتتحسر على الشعب و كانك على يقين تام انها على خطأ مع ان الصح و الخطأ مسأله نسبيه جدا .. و هو شافاها صح .. و ملحوظه بقى ..هما مكانوش بيحبوا بعض

على فكرة تعليقك ظريف جدا و متشكره قوى

koukawy said...

انتي بقي زي كوكو الكميل بتحبي السينما؟؟