Tuesday, November 27, 2007

عيد ميلاد بابا بكره

ماما جهزت الكيك اللى بابا بيحبه ,, و لسه هتعمل بسبوسه

انا و اختى هنحجز التورته بتاع العيد ميلاد
اخواتى الصبيان عايزين يجيبوا لبابا قميص جديد
ده بكره اول عيد ميلاد لبابا من سنين يعدى علينا و احنا مع بعض
.........خلاص بكره ان شاء الله هن ...... لحظه .. تليفونى بيرن


ايوة يا ماما خير

يارب يكون خير
خير فى ايه يا ماما

بابا اتحجز فى المستشفى
ليه ايه اللى حصل

هنروح دلوقتى و هنشوف ايه الحكايه

******************

.. بعد شويه .. كلنا مع بابا فى المستشفى ,,بابا عنده تعب فى القلب و الدكتور بيقول لازم يفضل فى المستشفى شويه عشان يعملوله استره فى القلب وطبعا هيستجيب للكلام و بعد شويه .. بنسلم عليه فعلا و بنسيبه و نروح

اول مره نسيب بابا فى مستشفى و نسلم عليه و نمشى ... موقف خلانى افكر كتير, فى لحظه ما كل واحد هيسلم على حبيب ليه و يتركه امانه عند ربنا بدون امل انه يقابله تانى فى الدنيا

الحمدلله لست متشائمه و لم يدفعنى اليأس مثلا ان افكر بهذا الشكل .. و لكن رايت الامربشكل مختلف ..فرصه من ربنا سبحانه و تعالى .. نقف مع نفسنا تانى و نفكر فى اعمالنا اللى هتكون المرافق الوحيد لينا فى الطريق فى الدنيا و الاخره وكمان نلحق نقول لحبايبنا اننا بنحبهم بجد .. قبل ما يجيى وقت نتمنى بجد لو كنا عرفناهم قد ايه هما غاليين علينا


اللهم أصلح اعمالنا جميعا .. بارك فى اعمارنا .. توفنا و انت راض عنا

********************


احنا بقينا بكره .. النهارده عيد ميلاد بابا .. مكان الاحتفال حدده القدر فى المستشفى .. جناح 10


معاد التجمع بعد الظهر تقريبا .. توكلنا على الله


ندخل على بابا تستقبلنا ابتسامته ووجهه المنور ,, باقه ورد كبيره .. شوكلاته .. عصير ..موز .. فى ايه .. هما بدأوا الاحتفال من غيرنا ولا ايه ,, ايه الحكايه يا بابا !!! ... إممممممممممممممممممم


بقى الحكايه ان امام المسجد اللى بابا بيصلى فيه راح الصبح يطمن عليه , و بعد شويه المدير و زملاء العمل و بعد شويه أصحاب بابا وهكذا ...

يال هذا الطفل بداخلنا ,, كل هذا البِِشر والسرور على وجه بابا من اجل زياره بعض الاصدقاء و الزملاء

قد كده زياره المريض شئ بيرفع معنوياته جدا ... سبحانك يارب

ربنا يجازيهم عنا خير الجزاء اللى زاروه ,,اللى اتصلو بيه .. اللى بعتوله ورد ..و الشيخ اللى استاذن منا يرقى بابا و مشى على طول .. كلكم خليتونا نشعر ان المرض برغم مرراته فيه جمال !!! نعمه و الحمدلله

***********************

جاء اليوم التالت فالرابع فالخامس ..لازلنا نتردد على بابا فى المستشفى .. وعدد الزائرين يزيد
يبدو ان بابا مع اقترابه من الستين لم يكتسب فقط شعرا فضيا و قلبا منهك , و لكنه احتل مساحه ما فى كثير من القلوب الطيبه التى احاطته بالزياره و الدعاء و لله الحمد والفضل , و لعل الله يستجيب دعاء الصالحين


***********************

بعد اسبوع بالظبط اتكتب لبابا خروج الحمدلله مع المتابعه و العلاج ,, وها انا الان اطلق سراح هذه التدوينه
التى بدات فى كتابتها منذ اول يوم

6 comments:

عالمى ازرق said...

كل سنه وهو طيب .. وانتى وكل الاسره بخير
و شفاه الله وعفاه

MarwaAshraf said...

يااااااااااااااااه.. كله ده

الحمد لله إنه خرج بالسلامة .. ربنا يبارك في صحته وعمره

كل سنة وهو طيب

:)

mohand said...

السلام عليكم
كل سنه وهو طيب

والف سلامة عليه ويمتعه الله بالصحة ويبارك له في عمره ان شاء الله

ويحبب كل الخلق فيه يا رب

Ahmed Essawy said...

حمدا لله علي سلامه الوالد ...
اسأل الله العظيم رب العرش العظيم أن يتمم شفائه علي خير .
اللهم رب الناس مذهب البأس اشف أنت الشافي لا شافي إلا أنت.

mohamed elbanna said...

صباح الفل لباباوليكى
الف سلامة
وآسف جدا لتأخرى فى السؤال والدعاء له بالصحه والعافيه

Maha said...

سلامه عمو ..

أجر وعافية إن شاء الله