! ... ساعات احلم بحاجات ميحلمش بيها غيرى

بعترف بغرابه حلمى ده , حلمى انى الاقى خدامه كويسه ,, كويسه فى طبعها .. بتتصرف كويس و فاهمه شغلها كويس , بتعرف تعمل ايه من غير ما حد يمليها الخطوات المفروض اتباعها .. حاجه كده زى اللى بنشوفها فى التليفزيون .. تخلص كل حاجه و الهانم او البيه قاعدين يشربوا القهوة فى التراس او يقروا كتاب او يكلموا فى التليفون

هييــــــــــــــــــه , انا فى قراره نفسى بعتقد ان سبب الحلم الغريب ده ..هو خبرتى التعيسه فى الموضوع ده ,, فمن زماااااان و انا صغيره كنت بقضى وقتى انا واخواتى مع الخدامات .. فتره الطفوله بقى و كانت من ازهى فترات حياتنا .. شوفنا فيها اللى بتسرق .. و اللى كانت تضرب او تحبس و اللى اخلاقها مش كويسه .. و احسنهم خُلقا .. كانت مريضه بالصرع ..لما سرعتنا بعيد عن السامعين , و فضلنا يا كبدى .. خدامات تشيلنا و خدامات تحطنا ,, لغايه اما اتغيرت الاحوال شويه و اصبح فى الامكان اننا نتدبر امورنا لوحدنا

لكن برده الامر ميسلمش..من حين لاخر بنحتاج مساعده فى شغل البيت ..فى مناسبه او غيره , وبيبقى كل املنا نلاقى واحده تساعدنا فى شغل البيت (المُعتاااد و الله) .. ساعات محدده فى اليوم ,, ...

و بذكر مره احتاجنا مساعده فى دخله عيد , دلونا ولاد الحلال على ست كويسه و شاطره و يوميتها معقوله .. مكدبناش خبر و بعتنالها .. و لسه بنسمى الله و بحطلها السلم عشان تفك الستاير و تنضف مكانها .. لاقيتها بتقولى

انا مقدرش اطلع على السلم اصلى كنت عامله عمليه فى ضهرى و ده ممكن اقع من عليه و كده

.. ياستى متخافيش انا همسكلك السلم

و هى ابدا و مفيش على لسانها غير كلمه واحده

مطلعش ع السلم ..مطلعش ع السلم

خلاص يا ستى متزعليش نفسك امسكى انتى السلم بعد اذنك و انا هطلع افكهم و انضف مكانهم

.. مجاتش يعنى على طلوع السلم ,, نروح ننضف الانتريه ..لسه بنزق الكراسى عشان تمسح وراهم

لا اصل ضهرىىى انتى عارفه

و الله ما انتى مكمله .. هاتى هاتى انا همسح انا

و قضينا اليوم على ادا الحال .. بس انا فى آخر اليوم كنت حاسه انى اتضحك عليا و انى الست دى جايه تشغلنى انا .. كنت حاسه بالظبط إحساس (ذكى) الله يمسيه بالخير لما مراته قالتله حكمتها الشهيره ... اكلوك الحلاوة يا ذكى ... اكلوك الحلاوة يا خويا

لكن برده مفقدناش الامل .. و مرت الايام و احتاجنا تانى لحد يساعدنا ..كنا فى رمضان و مُنتظرين ضيوف بعد الفطار .. و فى نفس الوقت بيتنا كان بيتعافى من دور تكسير و اعاده تبليط للحمام والمطبخ .. فكان فى شغل للصبح ,, لكن للعلم .. اغلب شغل البيت كان خاص بينا احنا .. اننا نعيد ترتيب غُرفنا و كده .. و شغل العمال خلصوه فكنا محتاجين واحده تساعدنا بس فى تنضيف الصاله و الصالون .. و احنا بنفرش كل حاجه ..

و دلونا ولاد الحلال تانى برده على واحده شاطره و كويسه .. جتلنا فى اليوم اللى اتفقنا عليه , و معاها ابنها الصغير .. قلنا يقعد مع حد من اخواتى ولا نجيبله لعب يلعب على ما مامته تخلص .. ومن نفسى بقى المره دى بعدت عن السلم و عن المسح , قلت ابعد عن الضهر و اغنيله , قلت اديها شغلانه بسيطه .. خليها تنضف الحيطان .. حسيت انها اندهشت قوى من فكره تنظيف الحيطان دى .. يعنى ازاى

ننضف الحيطان دى ؟؟

, وشويه ولا قيتها بتقول لماما انها هتروح ابنها و هترجع تانى .. قلنالها خليه هو ساكت اصلا و هادى ماشاء الله عليه

قالت لا ده شويه و هيعيط , خلينى اروحهه احسن عشان نركز فى الشغل .. عجبنا حماسها للشغل قوى الصراحه ,, قلنا طيب خلاص روحيه و تعالى .. و زى ما توقعتوا فاتت ساعه و يمكن اكتر على ما رجعت و قالتلنا معلش مش هقدر اكمل ..انتو باين عندكو شغل كتير ماشاء الله عليها ذكيه عرفت لوحدها ,, متخيله احنا هنطلبها ليه الا لو محتاجين المساعده بالفعل ....

.. المهم انى لغايه النهارده بحلم بحد ميشتكيش من ضهره , حد ميستغربش من تنضيف الحيطان .. حد يعمل كل حاجه وانا او البيه قاعدين نشرب القهوة فى التراس او نقرأ كتاب او نكلم فى التليفون .... احلالالالالالام بقى

______________________________

ملحوظه للى مش عارف او مش فاكر: ذكى المذكور اعلاه هو شخصيه فى مسلسل ( صابر يا عم صابر) و العباره دى قالتهاله مراته بعد ما رجع من الخليج و اتسرق منه كل حاجه بسبب حته الحلاوة اللى كلها فى التاكسى واتخدرو اتسرق