Sunday, July 22, 2007

! ... ساعات احلم بحاجات ميحلمش بيها غيرى


بعترف بغرابه حلمى ده , حلمى انى الاقى خدامه كويسه ,, كويسه فى طبعها .. بتتصرف كويس و فاهمه شغلها كويس , بتعرف تعمل ايه من غير ما حد يمليها الخطوات المفروض اتباعها .. حاجه كده زى اللى بنشوفها فى التليفزيون .. تخلص كل حاجه و الهانم او البيه قاعدين يشربوا القهوة فى التراس او يقروا كتاب او يكلموا فى التليفون


هييــــــــــــــــــه , انا فى قراره نفسى بعتقد ان سبب الحلم الغريب ده ..هو خبرتى التعيسه فى الموضوع ده ,, فمن زماااااان و انا صغيره كنت بقضى وقتى انا واخواتى مع الخدامات .. فتره الطفوله بقى و كانت من ازهى فترات حياتنا .. شوفنا فيها اللى بتسرق .. و اللى كانت تضرب او تحبس و اللى اخلاقها مش كويسه .. و احسنهم خُلقا .. كانت مريضه بالصرع ..لما سرعتنا بعيد عن السامعين , و فضلنا يا كبدى .. خدامات تشيلنا و خدامات تحطنا ,, لغايه اما اتغيرت الاحوال شويه و اصبح فى الامكان اننا نتدبر امورنا لوحدنا


لكن برده الامر ميسلمش..من حين لاخر بنحتاج مساعده فى شغل البيت ..فى مناسبه او غيره , وبيبقى كل املنا نلاقى واحده تساعدنا فى شغل البيت (المُعتاااد و الله) .. ساعات محدده فى اليوم ,, ...


و بذكر مره احتاجنا مساعده فى دخله عيد , دلونا ولاد الحلال على ست كويسه و شاطره و يوميتها معقوله .. مكدبناش خبر و بعتنالها .. و لسه بنسمى الله و بحطلها السلم عشان تفك الستاير و تنضف مكانها .. لاقيتها بتقولى

انا مقدرش اطلع على السلم اصلى كنت عامله عمليه فى ضهرى و ده ممكن اقع من عليه و كده

.. ياستى متخافيش انا همسكلك السلم

و هى ابدا و مفيش على لسانها غير كلمه واحده

مطلعش ع السلم ..مطلعش ع السلم

خلاص يا ستى متزعليش نفسك امسكى انتى السلم بعد اذنك و انا هطلع افكهم و انضف مكانهم

.. مجاتش يعنى على طلوع السلم ,, نروح ننضف الانتريه ..لسه بنزق الكراسى عشان تمسح وراهم

لا اصل ضهرىىى انتى عارفه
و الله ما انتى مكمله .. هاتى هاتى انا همسح انا

و قضينا اليوم على ادا الحال .. بس انا فى آخر اليوم كنت حاسه انى اتضحك عليا و انى الست دى جايه تشغلنى انا .. كنت حاسه بالظبط إحساس (ذكى) الله يمسيه بالخير لما مراته قالتله حكمتها الشهيره ... اكلوك الحلاوة يا ذكى ... اكلوك الحلاوة يا خويا
لكن برده مفقدناش الامل .. و مرت الايام و احتاجنا تانى لحد يساعدنا ..كنا فى رمضان و مُنتظرين ضيوف بعد الفطار .. و فى نفس الوقت بيتنا كان بيتعافى من دور تكسير و اعاده تبليط للحمام والمطبخ .. فكان فى شغل للصبح ,, لكن للعلم .. اغلب شغل البيت كان خاص بينا احنا .. اننا نعيد ترتيب غُرفنا و كده .. و شغل العمال خلصوه فكنا محتاجين واحده تساعدنا بس فى تنضيف الصاله و الصالون .. و احنا بنفرش كل حاجه ..
و دلونا ولاد الحلال تانى برده على واحده شاطره و كويسه .. جتلنا فى اليوم اللى اتفقنا عليه , و معاها ابنها الصغير .. قلنا يقعد مع حد من اخواتى ولا نجيبله لعب يلعب على ما مامته تخلص .. ومن نفسى بقى المره دى بعدت عن السلم و عن المسح , قلت ابعد عن الضهر و اغنيله , قلت اديها شغلانه بسيطه .. خليها تنضف الحيطان .. حسيت انها اندهشت قوى من فكره تنظيف الحيطان دى .. يعنى ازاى
ننضف الحيطان دى ؟؟
, وشويه ولا قيتها بتقول لماما انها هتروح ابنها و هترجع تانى .. قلنالها خليه هو ساكت اصلا و هادى ماشاء الله عليه
قالت لا ده شويه و هيعيط , خلينى اروحهه احسن عشان نركز فى الشغل .. عجبنا حماسها للشغل قوى الصراحه ,, قلنا طيب خلاص روحيه و تعالى .. و زى ما توقعتوا فاتت ساعه و يمكن اكتر على ما رجعت و قالتلنا معلش مش هقدر اكمل ..انتو باين عندكو شغل كتير ماشاء الله عليها ذكيه عرفت لوحدها ,, متخيله احنا هنطلبها ليه الا لو محتاجين المساعده بالفعل ....
.. المهم انى لغايه النهارده بحلم بحد ميشتكيش من ضهره , حد ميستغربش من تنضيف الحيطان .. حد يعمل كل حاجه وانا او البيه قاعدين نشرب القهوة فى التراس او نقرأ كتاب او نكلم فى التليفون .... احلالالالالالام بقى
______________________________
ملحوظه للى مش عارف او مش فاكر: ذكى المذكور اعلاه هو شخصيه فى مسلسل ( صابر يا عم صابر) و العباره دى قالتهاله مراته بعد ما رجع من الخليج و اتسرق منه كل حاجه بسبب حته الحلاوة اللى كلها فى التاكسى واتخدرو اتسرق

11 comments:

عـلا - من غـزة said...



مرحبا

على ما يبدو دي زيارتي الاولى للمنطقة

شوفي يا ستي ,, احلامك في محلها صدقيني ,, احنا اتعرضنا لنفس الموضوع من كام سنة لما ماما جالها الغضروف وبقت فعلا محتاجة حد يساعدها في التنظيف ,, خاصة شيل السجاجيد والكنب والحاجات التقيلة دي ,, ووقتها انا واختى كنا صغيرين
وفاكرة ان في حد دلنا على وحدة شاطرة ولهلوبة في الشغل وفعلا جت وكانت كدة زي ما انتي بتقولي عايزاها ,, بتعرف شغلها كويس ونضيفة وبتعمل الحاجة من غير ما حد يقولها
النكتة فين
ماما طبعا كانت بتبقى تتكلم معاها ومن بين الكلام عرفت انها متعلمة ومعاها شهادة جامعية ,, بس العوزة الي هي فيها رمتها على الخدمة في البيوت ,, وامي بئاااا ما تعرفيهاش !! في الامور دي تعتبر المدافعة الاولى عن حقوق المرأة وفضلت تقنعها انها لازم تلاقي فرصة احسن من كدة ,, وانها تشتغل بشهادتها,, وفعل اقتنعت ولقت وظيفة محترمة وقررت تسيب الشغل في البيوت نهائي ههههههههههههه
واحنا من ساعتها بندور على وحدة تكون شاطرة زيها !!

بس يا ستي .. طولت عليكي

احنا دلوقتي كبرنا بئى وبنقسم الشغل في البيت ونوعا ما قايمين بالواجب
لكن طبعا يوم ما بنتعب بنفتكر البنت دي ونفتكر ايامها هههههههه

ياللا ربنا يرزقك بوحدة زيها كدة

سلامات :)

Anonymous said...

صعب جدا قوى خالص موووووووووت
امال ازاى هايقلبوا عيشهم وياكلوها والعه
افتكر انا واخواتى لما كنا صغيرين كنا بنلعب لعبة الخدامه
تتلخص فى واحده مستكينه وغلبانه الكل دوره انه يشتمها ويضربها وهى تقول حاضر وبس
دى فكرتنا عن الخدامات زمان
لكن دلوقى... ماعلينا بقى
اه على فكره
حفلة أيامنا الحلوه يوم 27 يوليو الساعه 8:30 فى ساقية الصاوى
اكبر تجمع بلوجرى اوعى يفوتكو
Blogger Radio Station

EGYPT EYES said...

بقى الخدمات اللي في الغالب بيصرفوا على عيله بحالها ومن ضمنهم الزوج نفسه بيعملوا كل المشاكل دي
طيب خلاص ياستي سيبك من الخدامات اللي بيكلوها ولعه دول أن كان ينفع خدامه تكلها ولعه يعني !!!!!!!!!!!! وأخدمي نفسك بنفسك احسن عشان تضمني مستوى النضافه
تحياتي وأحلام سعيده المره الجيه

سحر الخواطر said...

سحر الخواطر http://el-condor.piczo.com

سحر الخواطر said...

سحر الخواطر http://el-condor.piczo.com

Reemo said...

عارفه المشكله فى قله الضمير
الناس لو عندها ضمير بجد هتشتغل من غير ما تحتاج اى توجيه
بس تقريبا الناس عايزه فلوس من غير تعب ومن غير اى مجهود
عارفه الواحد بجد لو كان يقدر كان يستغنى عنهم بس فعلا ساعات مجهود البيت بيبقى اكتر من اللازم والواحد بيحتاج مساعده
احلامك مش خياليه وبجد انا كمان بحلم زيك فى خدامه كويسه تساعد بضمير

محبتى

TheRiddle said...

بجد البلوج بتاعك يا بنت مسلمة رائع جدا
وعجبني جدا جدا
بسم الله ماشاء الله عليكي
الى الامام دائما

خمسة فضفضة said...

السلام عليكمورحمة الله وبركاته

هههه

حلكمك هوه نفسه حلمي يا بنت مسلمه
بسبب ظروف شغلي اللي بتخليني معظم النهار خارج البيت فادايما باحتاج واحده تساعدني

عندي فعلا واحده وفيها كل المواصفات اللي بتحلمي بيها دي ، كل اللي عليا اني اديها ادوات النظافه وهي عليها الباقي وبصراحه عندها ضمير جدا
بس للاسف في الفتره الاخيره جالها حساسيه في صدرها وصحتها ادهورت وبقت تيجي مره وتغيب عشره ، وماباقتش عارفه اعمل ايه ...عاااااااااااااااا

لو تعرفي واحده دليني عليها الله يخليكي


تحياتي

فى القلب said...

واللهى يا بنتى انتى جيتى على الجرح وضغتى
أخر مغامراتى
لمت هدوم العيال وفتحت الباب السا عه
سته الصبح عشان كانت مقيمه ومن الارياف
وشفتلها سكه
الله المعوض
تحياتى

The Groom said...


هو ده زكي الناصح؟

:))

بوست جميل

وياما برضو شربت أنا من الخدامات بس الحمدلله كانوا اتنين بس الاولى طفشناها والتانية بقت حلوة وكويسة ومحترمة واسلمت كمان على ايدينا

تحياتي لك من ماناساس البلد

Ahmed Essawy said...

دي مشكله الشغل المصري و الي فضحانا حتي في بلاد برة .
المصري نارد الضمير و مملوء بالكسل
دايما يقول المصري بتاع كلو و لكن مفيش حاجه بيظبطها صح .
اني لو بتتكلمي فيها و الله انا من كام يوم كنت بصلح شكمان العربيه قعدت عند الراجل بتاع ساعتين علشان بيصلحه حضرته افتكرت ايام الكويت لما بيكون العمال هنود و الله مكنش العمليه دي بتاخد معاه بص ساعه .
هنا الواحد بحس انو جوه تمثيليه و مش بتنتهي .
بجد الشعب المصري ماشي بالتصوير البطئ في كل حاجه ..
و لاكتر من دا و يمكن تقولي عليا مجنون و لكن دي الحقيقه بره الناس بتقدر قيمه الوقت ...
انا لما بمشي في شارع في مصر بلاقي الناس ماشيه بطيئه ببقي نفسي اقول للناس امشو بسرعه بفسي ازق الناس مس كدا يا عالم ...
انا مش حقولك يعني ان بره بقي بيجرو و هما بيمشو ولا حاجه

و لكن بيمشو ..من غير ما حد ان فيه حاجه او اني نفسي اقولهم امشو بلاش كسل .