Saturday, March 1, 2008

حد يقدر يساعدنى ؟

طبعا انا متعودتش اكتب عن مشاكلى الشخصيه , و بعتمد على ربنا فى الحل ثم المقريبن المقريبن يعنى
بس يمكن المره دى المشكله اكبر من المقربين شويه ..أو يمكن كتير و محدش عارف يساعدنى
فقلت أستشير المدونين و المدونات و اى حد أصلا ممكن يعدى من هنا فهو معنى جدا بالاستشاره دى
باختصار .. انا عندى جاكت جديد.. قصدى ( كااااان) عندى جاكت جديد , لونه بيج فاتح خالص و خامته اللى هى
الجينز الخفيف ده ,, كان جديد خالص .. و انا بغسله جت عليه الوان هدوم تانيه و بوظته .. يعنى بهدلته الصراحه
فانا حاولت انى انضفه بكلور الوان ..مأثرش معاه ..بعته المغسله, الراجل قال ده مش ابيض و بالتالى مش هعرف احط
عليه كلور ولا حاجه تانيه , و انا بدورى سالت ناس كتير .. بس معظمهم بيقولوا خلاص انسى الجاكت
انا بقى مش عايزه انسى بسهوله كده و عايزه احاول فيه تانى ... عشان انا مش هاين عليا محاولش خالص كده
و كمان مفيش حاجه اخسرها يعنى لو حاولت ..
فاللى عنده اى وصفه كيميائيه - غير ميه نار يعنى - أو طبيعيه حتى ياريت يكتبهالى و انا هجربها
ملحوظه : ياريت محدش يقولى هو فى حد اهبل يغسل الالوان مع بعض و ازاى متخديش بالك و كده , عشان أنا بلوم
نفسى بزياده

5 comments:

Eric Matt said...


الدعوة الحلوة يا رب تكوني بخير واهلك بخير ووالدك بخير

التعليق

عندي اقتراح بسيط ... ليه مش تروحي لما تنزلي مصر لحد أي مصبغة وب عشرين جنيه ولا حاجة يصبغوه مادام التنضيف مش نافع معاه ممكن يصبغوه لون تاني اغمق شوية ... أعتقد ده حل كويس

الحل التاني صعب شوية وكان مفضل دايما عند ستي الله يرحمها انك تغسليه بالكلور بس بايدك بجوانتي طبعا وفي طشط وعلى مهلك خالص وتدعكي كويس

يمكن مش ينفع

الحل التالت اتبرعي بيه للغلابة تكسبي فيه ثواب

الرابع بقا معرفش :)

تحياتي

moony said...

نعمممممممممم..بقى مبتحكيش مشاكلك الشخصية وبستعينى بربنا بس .والمشكلة دى اكبر من المقربين ,شوية وهنلملك تبرعات وفى الآخر تقوليلى..الجاكيت بهتت عليه الهدوم التانية؟؟عدى من قدامى يابت بدل مااطلع كل غلى فيكى.

MarwaAshraf said...

هههههههههههههههههههههههههههههه
هههههههههههههههههههههههههههههه
هههههههههههههههههههههههههههههه

معلش غصب من عني.. بس أصل هم يبكي وهم يضحك اما بقى بالنسبة للمقترحات فأنا بضم صوتي للتعليق الأول خصوصا موضوع الصبغ

تحياتي يا جميلة

MarwaAshraf said...

صحيح نسيت أدع الدعوة الحلوة

يارب ربنا يجعلك من اهل الجنه

ويرزقك حسن الخاتمة
وعينك على بر والديك
اللهم أمين

Anonymous said...

عن تجربة

إغسليه مرات متكررة

يعنى كل غسلة فواتح عندك إغسليه معاها

وبعد كذا مرة هايرجع لطبيعته

جربى وإدعيلى


soso