بعد نص الليل

بما إنى كائن نهارى ,, أستيقظ مبكرا و أنام مبكرا .. بشعر دايما أن صحبانى نص الليل سواءا لقلق أو لسهر,, بيدخلنى فى مود مختلف من الأفكار و المشاعر ,و حقيقه مش متأكده دا بسبب وقت الليل و السكون و تأثيره على الناس عموما ولا السبب غرابه الجو عليا

و بما أنى عديت منتصف الليل بعده ساعات دلوقتى فطبيعى أفكارى هتبقى غريبه ,,أو خلينا نقول مش غريبه لأنها أفكارى أنا فى الأول و الاخر لكن مفيش مجال تظهر بوضوح فى عقلى غير فى وقت زى دا ... بفكر فى فكره تسلط انسان على انسان تانى يما يملك من قوه ,, وجه على بالى حاجه غريبه أوى ,, تسلط الأوربيون المهاجرين لقاره امريكا على السكان الأصليين و إبادتهم و التخلص منهم ,,الناس دى كان راكبها كام مليون عفريت ؟كميه شر قد ايه.. قسوه قلب قد ايه عشان يبيدو قبائل وشعوب كدا بدون وجه حق ,,بتخيل شكلهم قدام ربنا

و شكل حسابهم ايه .. ربنا يعافينا من الظلم يارب

شويه ولاقتنى بفكر فى حاجه تانيه بتخوفنى جدا ,, فكره الاعتماديه ..الاعتماد على شخص معين فى حياتك عشان تحس بالسعاده و الأمان ,,المشكله هنا انك واعى و عارف ان الفكره دى غلط بس هى عمرها ما بتيجى قرار,, هى بتغرقك فيها واحده واحده ,,لغايه ما يبقى مينفعش بجد لا تسعد ولا تشعر بالأمان دا ولا تهنأ بحاجه أصلا من غير الشخص اللى بيدك الأحساس دا,, والمشكله هنا ان الشخص دا مش ملك يمينك دا ملك ربنا ..قلبه و حياته ملك ربنا ,, الاحساس دا بيخوفنى قوى و بيحسسنى بالعجز و بحس انه غلط كبير حد عاقل يوصل نفسه للمرحله دى ,, يارب متملكش قلوبنا لحد غيرك يارب ,, بفتكر دلوقتى كلمه الإمام على لما سُئل عن العشق فقال: (قلوب خلت عن ذكر الله، فأذاقها الله حب غيره),, الغريب بقى ان الفكره دى كثييييره الإلحاح على عقلى فى أوقات بعد منتصف الليل بالذات ومش أول مره أفكر فى معنى الفقد لحد بنحبه فى حياتنا ... وأنا بكتب كلامى دلوقتى تذكرت رساله لصديق كان ,, كتبتها من حوالى سنه و نص و فى نفس الوقت من الليل, كتب فيها

انا نمت بدرى كالعاده و صحيت نص الليل كده ,مكنش فى حاجه معينه اعملها اكتر من مراجعه الرسائل و شويه مواقع و كنت يعنى المفروض اعمل حاجه معينه بس محصلش نصيب لسه .. امممممم الكلام اللى هقوله ملخبط شويه .. يمكن لانى ادراكى و احساسى بيه متلخبط برده .. كنت بسمع اغنيه عايده الايوبى ان كنت غالى عليا .. و حسيت ان العباره بتاعت " الدنيا فى عينيا ما تحلى فى يوم و انت بعيد و الدنيا حلاوتها كلمه حلوه تطمنى" مش عارفه خليتنى افكر فى حاجات كتير , يعنى بعتقد ان الليل و وقت السحر بيخلى الواحد يفكر فى حاجات غريبه ,, او يفكره بيها لانها بتكون فى وعيه اصلا ,, فكرت انه اى بنت او ولد فى سنى مهما كان مفتقد وجود حد فى حياته و بيدور عليه و بتاع و نفسه جدا يكون موجود .. عايزة اقول انك ممكن كل يوم تصحى ويبقى عندك امل انك هتقابل الانسان اللى بتدور عليه .. حتى لو كبرت ..حتى لو بعدت .. حتى لو اى حاجه ..الأمل موجود .. ساعات بتزهق و ساعات تتفائل و هكذا
لكن لا قدر الله و بعد الشر على كل الناس .. صعب قوى تقابل الحد ده فعلا و تحس معاه كل حاجه تقريبا و تبدأ معاه الرحله و فى النص يسبك لاى سبب سواء باراده ربنا او بكيفه مثلا
مش عارفه بفكر فى الأرامل اوى, حتى لو كبار فى السن ..انا لسه فاكره يوم وفاه نينه الله يرحمها كانت نايمه على الكنبه بتاع بيتهم و جدو قعد قدامها يبكى زى الطفل و يقولها كده تسبقينى !!

و الله مش بعترض على حكم ربنا بس بحس ان الحياه ممكن تبقى صعبه قوى ازاى تصحى تانى يوم و تواصل و انت .............. مش هتتواصل مع حبايبك تانى .. كنت بسمع قصه فى الراديو من كام يوم .. واحده باعته رساله بتقول ان جوزها اذاها كتير و كانت بتتمنى اليوم اللى يرحمها و يفارقها و العجيب انه لما فارقها فعلا و عندها اولادها معاها و معاشها و ميراثها اصبحت تبكيه و تشتاق وجوده .. !!
انا قلت اللى بفكر فيه و خلاص .. لو انى بعتقد ان ده تأثير الليل و السحر ..
انا هقفل الاغنيه اللى اشتغلت الف مره دلوقتى و هقوم اشوف هعمل ايه

***

وأنا هوقف كتابه و أقوم أشوف لو ممكن أنام شويه عشان افوق من هلاوث بعد نص الليل دى