نشرتى النفسيه .. روايات و رسائل و حنين لا ينتهى

روايات أقرأ نفسى فيها .. استمتع بلغه تسكننى وما كنتُ أعلم

و رسائل بدأتها عبًثا فمدت لى جسراً إلى ماضى جميل

و حنين جارف لشاطئ حفظ خطواتى على بحرٍ مازل ُيداعب أحلامى فى اليقظه والمنامِ

كلمه حق يُراد بها باطل

دائما اسمع هذه العباره فى الامور الكبيره ( السياسيه - الدينيه - المواقف الاجتماعيه ...) و لا اعتقد انها عكست لى معنى بعينه قبل اليوم ,,عندما نادانى والدى بلقبى الشهير يا (بشمهندسه ) والذى يُستخدم فى مناسبات معينه , فوجدت هذه العباره تترد فى عقلى كما صدى الصوت بين الجبال ..

كلمه حق يراد بها باطل .. كلمه حق يراد بها باطل .. كلمه حق يراد بها باطل ..

ما هو من غير المعقول ايضا ان يكون والدى يقصد ان ينادينى بلقبى المهنى - فقط - عندما ارتكب خطا ما و أقصد بالخطأ هنا ..وضع اى شئ فى مكان خطأ فيأتينى النداء..مش هنا يابشمهندسه ..او تركيب شئ بشكل خاطئ ..مش كده يا بشمهندسه ..او الاهمال فى الحفاظ على اى شئ مهم .. او كسر مصباح (بشكل غيرمقصود و الله) كما حدث اليوم ..امال لو مكنتيش بشمهندسه , اصبح معنى هذه الكلمه عندى = يا .... واترك الفراغ هنا لكل ذى مفهوميه .

يا بابا .. يا أحب واقرب اصدقائى الي قلبى هذه كلمه حق, يُراد بها باطل ... انا بالفعل درست الهندسه و لكنى متأكده انك لا تتباهى بكونى مهندسه عندما أقع فى هذه الاخطاء اللتى تراها سخيفه ,, انا أخطأت - وهى سمه البشر- .. و لكن ما ذمب الهندسه والمهندسين والبشمهندسيه كلها لتتحمل خطأى

سوء الفهم وعمايله

مفيش حاجه أحسن من ( سوء الفهم ) ممكن تقلب حال العقل رأسا ًعلى عقب .. و الله ان كان العقل ده عباره عن تروس بتلف بشكل متكامل مع بعض , , هتلاقيها فجأه بتلف بسرعه مش طبيعيه و من اليمين للشمال و بالعكس و احتمال كل ترس ياخد نفسه و يلف لوحده ..لخبطه بقى ... و ياسلام بقى لو العقل ده أسلاك و فيوز و كده .. كله هيلمس مع كله و مش هيبقى على قد العقل و بس, ده المنطقه المحيطه بيه كلها هتبقى صاعق كهربائى لكل من تسول له نفسه الاقتراب .. أما بقى الانواع الجديده من العقول اللى بتبقى كمبيوتريه ... بتلاقيه هنج و البروسيسور بتاعه جاب جاز فى الاخر

بذكر مره ايام ما كنت طالبه فى الكليه كان عندى امتحان اعمال سنه و حضرتى بقى دائى و سمى الغش ولا ممكن ابدا ابدا اسمح لنفسى بالغش و مش هدعى التدين و اقول عشان حرام , بس عشان كرامتى اصلا مبتقبلش عليا انى اغش حتى لو هسقط ..المهم فى نص الامتحان لاقيت المُعيد بيمررعلى بعض الطلبه ورقه عشان كل واحد ياخد اجابه الاسئله منها بسرعه يمررها للى بعده و انا شوفت المنظر و اللى حصلى محصلش لحد بقيت قاعده اكل فى نفسى و مش عارفه اقوم احرج المعيد قدام الناس و اقوله يختشى على دمه و لا اسكت و ادع الخلق للخالق بس يعنى هو بيعمل كده ليه؟ عشان الطلبه اللى بياخدو عنده درس و اللى مبياخدوش يسقطوا يعنى ولا ايه ..ايييييييييييييييييييه هو الضمير انعدم يا ناس لا ايه؟ المهم قررت اختار اضعف الايمان وبما انى مقدرتش اغير الباطل ده همنع نفسى على الاقل من الغش ..

و شويه و لاقيت الورقه اللعينه و صلتنى وفعلا مبصتش فيها حتى ,, مش انا يا افندى ... لاااااااااااااااااااااا لاااا و الف لاااااااااااااااا انت فاكر ايه ... و رميتها للى بعدى بمنتهى الاشمئزاز من مستوى الضميرااللى وصل لكده ... و انا رميت الورقه من هنا و الشيطان ابن اللذين استلمنى من هنا .. ايه السذاجه دى يعنى لازم تعملى فيها خضرا الشريفه كنتى بصيلك بصه سريعه كده و خلاص اهوه كل الناس هتفلح الا انتى .. و على دا الحاال لغايه ما لاقيت المُعيد بيقول بصوت جهورى كده فى القاعه حد مكتبش اسمه فى ورقه الغياب ..صحيت من الفيلم اللى كان شغال من بطوله عقلى و رفعت ايدى ببلاهه و قلت انا ,, قالى ازاى ده الورقه عدت عليكى ادامى .. !!

قلت ورقه ايه,وغياب ايه... حضرتك عاوز تقول انه..يعنى انا..كل الافكار دى كانت ؟
و الورقه المسكينه دى اللى انا اطلقت عليها ظلما و عدوانا " اللعينه " كانت ورقه الغياب فقط لا غير,, امال انا فكره الغش دى جاتلى منيييين بس؟؟
يالللللللللللللللللللللله ...اهوه ده سوء الفهم اللى بحكيلكو عليه ..كله منه.
...