!! مُتلبسه بالشوكلاته

أعلم أنى ارتكب الجرم المُحرم فى كل الأعراف و الكتب المُقدسه لقوس قزح

عندما أفكر فقط فى معشوقتى الشوكلاته

ولكن الأمريستحق المخاطره

حسنا يا قوس قزح , لقد أثبتت لى أن ألوانك السحريه تستطيع ملاحقتى من قاره الى قاره- وإحضارى من قفايا - فتجعلنى ارتبك من الدهشه و ُتسقط من يدى باكو الشوكلاته الحبيب فى آخر لحظه

ولكن من قال ان للسحر سُلطاناً على الذين آمنوا , و باعتبارى من أشد المؤمنين_ بِحُب الشوكلاته طبعا :))) سوف أُبرهن لك ان تلك الألوان الساحره ماهى الا ضرب من ضروب حظ و تنجيم لا اكثر

ولنُجرب الان ..سوف أضع هذا الجهاز- اللى بيجيبنى من قفايا- أمامى وأحاول مره اخرى أن أحصل على الشوكلاته فان استطاعت ألوانك الساحره أن تشى لك عنى ,, فلسوف أتوب عن هذه الشوكلاته و لتعلم أنى لم أخنك بالغيب و أن الله لا يهدى كيد الخائنين

وإن لم تفععععععل , فهنيئا لى صدق حبى للشوكلاته

هيا بنا 1 ..2 ..3

أذهب لرفوف الشوكلاته .. أُراقب الهاتف

أُقلب نظرى فى الألوان المُبهره للشوكلاته و أخطف نظره سريعه للهاتف مره اخرى .. لاشئ .. ربما كان قوس قزح نائم الآن :) ..حسنا جدا

ألتقط باكو شوكلاته كبير و اتجه بسرعه للدفع قبل ان تلحقنى الألوان

أدفع ..

أختبئ مع الشوكلاته فى مكان آمن

أنا وحدى الآن مع الشوكلاته ,لم تلحقنى الألوان ولا قوس قزح ..لاشئ ..

.هيييييييييييييييييييييييييييييييييييييييييييه

يالحلاوه النصر .. قصدى الشوكلاته .. الكبيييره

.

.

.

.

.

.

.

وبعد الإنتهاء من أكل الشوكلاته

سامحنى يارب

سامحنى يا قوس قزح

:)

موسم لقوس قزح

أكتشفت مؤخرا أنى عاجزه تماما عن التعبير بالكتابه عن أى من مشاعر الرضا أو الفرحه

مش عارفه ليه كدا :( مع انى لو زعلت من اى حاجه حتى لو عبيطه, هعرف أعبر عنها و املأ الدنيا بالحكى عن ألمى

ممممم, يمكن عشان مبعرفش أفرح قوى ,حتى لو مشيت مشوار طويل و تعبت عشان أوصل لهدف مبعرفش أطييييييير من الفرحه لما أوصله بالفعل

و يمكن عشان بخاف أفرح قوى أوبخاف يبان عليا فرحانه قوى فاتحسد :) !! يمكن برده

أو يمكن عشان أنا فرحتى فى الأصل هى احساس بالرضا + ابتسامه شبه ثابته على وشى أغلب الوقت... بس كده

المهم اتا بكتب الكلام دا ليه دلوقتى ..آاااه...

عشان ادون للمستقبل و للتاريخ انى فى الوقت دا من حياتى كنت بمر بمرحله من الرضا عن حياتى, اللى أصبحت مرتبطه بقوس قزح الى ماشاء الله , الحمدلله:) ..أنا عارفه ان المفروض أكون فى غايه الفرحه لكن للصدق أنا بين بين ..لا فرحانه قوى ولا زعلانه طبعا

ولكن راضيه.. كل الرضا الحمدلله ,و أعتقد أن الحاله دى استجابه لطلبى من ربنا دايما يجعلنى بين بين فى كل الأمور, , و على عكس كتير غيرى بيوصلو للمرحله دى بعد مشوار طويييييل و بيبدأو ياخدو نفسهم ... أنا لسه بحط رجلى على أول المشوار ,, وهاخد نفسى برده و أبدأ الرحله و الله المستعان

________________________

:تحديث لابد منه

كتبت الكلام السابق دا من عده أيام و أحتفظت بيه فى المسوده زى ما بحتفظ بحاجات كتير بكتبها من فتره طويله وبكتفى بوجودها فى مسودتى بدون رفع ,, امبارح وأنا بتصفح الايميل-بعد غياب فتره- عرفت بموضوع غياب مدونه ابيتاف من على البلوجر ...كان شكلى غريب و انا بتابع كل اللينكات اللى وصلتنى من الفيس بوك بسرعه و اتنقل من هنا لهنا لما وصلت للمدونه الجديده وطبعا قرأت البدايه الجديده ,ولاقيت نفسى فى السطور دى

اللحظات الكتيرة اللي كانت بتقاوم ذاكرتي الضعيفة عشان مش تتنسي..فكنت بسجل تفاصيلها المستخبية اللي محدش كان بيعرفهاغيري .. مهما حد حاول التفسير.. ومهما حاولت انا التعتيم .. كنت انا بس اللي عارفة حتي تفاصيل الصورة بتعني ليا ايه

أنا كمان بمارس سياسه التعتيم و التمويه :) عشان ادون تفاصيل أفضل انها تكون مستخبيه فى حياتى

يمكن لما زعلت علي مدونتي القديمة..لان فرصة اني اقرا - او بمعني اصح اعيش لحظة- كل تدوينة تاني..واستدعي لحظات وتواريخ ,خاصة جدا حتي لو كانت مجرد تدونية باقول فيها .. صباح الخير

أنا كمان بعيش اللحظه اللى كتبت فيها كل تدوينه بنفس الانفعال بتاع أول مره لما أقرأها تانى

لاقيتنى بفكر فى لحظات كتير محتاجه ادونها ضرورى و كأنى بمد فى عمر اللحظه و تعيش معايا عمر كمان و أفضل احس باحساسها تانى كل مره أقرأ فيها اللى دونته عنها

محتاجه ادون احساسى بالرضا دلوقتى عن وجود قوس قزح فى حياتى

محتاجه ادون احساسى بالسعاده لانك بينا يا ابيتاف

الحمدلله على كل شئ