شكرا يارب
فى خيالى شكل بالونه, منفوخه و الوانها حلوة و مغريه للعب
وتيجى على اقل شكه دبوس يبقى بخخخخخ.....معتش فيه لا بالونه ولا لعب
اهوه الشكل ده ظهر فى خيالى وانا بفكر فى اى حاجه ممكن تسعدنا فى حياتنا ,بعد ما نتعب عليها - زى ما الطفل الصغير لما يتعب على نفخ البالونه - و نوصل للحظه اللى المفروض نشوف فيها اثار تعبنا ده ,,و تبقى الحاجه محلوه بجد و مفرحانا زى فرحه الطفل ده بالبالونه بالظبط
فتيجى حاجه – ولاحاجه - تافهه جدا ,,زى شكه الدبوس..تاخد منك البالونه و الفرحه
وتسيبلك هواااااا...ولومحظوظ زى حالاتى يبقى تسيبلك هوا وأفكار
زى ما تكون الافكار دى كانت مستخبيه جوه البالونه ..فانت لاهى عنها بالبالونه العسوله و هات يالعب
لكن انت محتاج تشوف فقاقيع الافكار دى .. لازم تفهمها .. فربنا يبعتلك شكه الدبوس دى
وتلاقى نفسك بتقول الحمدلله و شكرا يارب
الحمدلله انه مكان البالونه فيه أفكار مش هوا بس
وكونى بقول الحمدلله ,, فدى كمان نعمه تستحق الشكر
