Saturday, January 19, 2008

اختيار تالت



ساعات بترسملك الدنيا دور فى لعبه بدون ما تاخد بالك ,, و مع الوقت بتدخل اللعبه فعلا
و تبدأ العبه تحلو بقى و تعجبك .. تبدأ فى الأول بهدوء .. خطوه خطوه .. نقله نقله
و شويه و تندمج أكتر
و من حلاوة اللعبه بقى بتنسى خالص - او تتناسى - ان فى مبدأ بديهى لكل لعبه
اسمه النهايه
و نهايه اللعبه يا مكسب يا خساره
WIN OR LOSE
و ده المتعب و المؤلم كمان
!! مفيش غير الاختيارين دول
ليه مفيش اختيار انا اكسب وانت تكسب
WIN .. WIN
مش عارفه .. لكن أنا مش حاسه انى عايزة اللعبه بتاعتى تنتهى
مين أصلا اللى افترض انى لازم هكون سعيده لما أكسب لوحدى ... أو لازم أقبل الخساره
لو النهايات دى هترضى غيرى فانا لا ... هفضل أدور على اختيار تالت..اختيار يقبل القسمه على أكتر من طرف و يسعد أكتر من طرف

Sunday, January 13, 2008

.... رحمتك يارب





اكتر حاجه ممكن تخجلنى من نفسى ان حد يعتزرلى
مبحبش ومبتحملش أصلا حد يقول أسف
حتى لو غلطان فيا .. كفايه كلمتين صُلح بيراضونى
و النيه الصادقه بتتحس و بتوصل على طول
لكن من عجب الدنيا دلوقتى .. انك تعتذر لحد .. فيرفض اعتذارك بمنتهى القسوه
و العجب الأكتر .. ان الحد ده هو اكتر حد بتنتظر منه كرم الُمسامحه
ده انت ساعات بسذاجه كده بتفكر انه اول ما هيشوفك رايح عنده
هيقولك كفايه انك جيتنى .. دى كبيره عندى
فلما تروحله فعلا تلاقيه بيدور وشه عنك ولا كانك كنت فى حياته يوم
يااااااااااااااه على القسوه
رحمتك بعبادك يارب