Sunday, March 25, 2007

ربنا يطمنا عليك


قلقانه عليك قوى اليومين دول يا حبيبى
....
شايفاك بتضغط على نفسك قوى , و بتبذل مجهود زياده جداا
بتنام قليل و على طول بتفكر .. و مشغول البال ,, و مش
عاوز تحكى على سبب قلقك
كل شويه اتصل بيك بأى حجه عشان اطمن عليك ... تقولى انا بخير , لكن صوتك الهادى قوى بيقولى فى شئ شاغلك وتاعبك ... أنا متاكده من احساسى ... مش على طول تقولى انتى اكتر واحده بتحسى بيا ...
ربنا يروق بالك و يطمنا عليك

Wednesday, March 21, 2007

الحياه سنيما ..... و حاول تفتح عينيك

مشهد -1- من داخل نفسى
النهارده اتفاجأت انها نهايه الاسبوع ... من غير ما انتبه .. مع انى دايما كنت استنى آخر الاسبوع عشان
بيجى و معاه .. المفاجآت أحيانا .. مُتعه الاجازة أحيانا .. لقاء الاصدقاء فى أحيان أخرى ...لكن
واضح ان حتى التفاصيل الصغيرة اللى بتدى للحياه معنى و بتكسر الروتين شويه ... مش مضمون استمرارها .. او مش مضمون احساسنا بجمالها ....
**************
مشهد -2- قُريب منى
فى الفترة الاخيرة قربت جدا من تحقيق حلمها اللى انتظرته كتيييير جدا ... و بعد ما اصبحت قاب قوسين او ادنى منه .. و خلاص هتمسك سعادتها بايديها .. بصت لاقيت نفسها ماسكه القلق و الخوف من بكره .... ونظرات التحذير بتحاوطها من كل حاجه و كل حد حواليها ,, نفسى جدا أشوفها فرحانه .........
أصل الفرحه دى بتعدى .. نفسى أفرح أنا كمان
**************
مشهد -3- مشهد خارجى
هى : يا الله على غروره يا ناس ... عمره لا بيسلم ولا بيكلم ... لا و كل المظاهر المحيطه بيه بتساعده على كده
بس ولو ... بكره الغروووووووووور انا ... مهما يكون
هو : لو سمحتى هو ممكن تبقى فى المجموعه بتاعتنا ... مين ... أنا؟؟
ايوة انتى بتكلمى صح .. اسمعوها يا جماعه عندها وجهه نظر فى الموضوع
هى : طيب انا افكارى كده ,, عايزة كل واحد يتصرف بالشكل ده .. هيناسبكو كده ؟
.. هو : تمام
هى : أنا مديونالك بالاعتذارعن كل لحظه شوفتك فيها حد غيرك
عشان انت مش مغرور فى الحقيقه .. لا .. مش مغرور أبدا ً
****************

Sunday, March 11, 2007

أنا عندى حنيــــــــــــن ... ما بعرف لمين


اول مرة اسمع الأغنيه دى لفيروز .. و بما انى كنت بسمعها فى وقت هادى .. كنت قدرا محاطه بوقت من الفراغ ,,ادانى فرصه اركز معاها قوى

انا عندى حنين مابعرف لمين

ليليه بيخطفنى من بين السهرانين

بصير يمشينى لبعيد يودينى

مابعرف لمين مابعرف لمين

****

نفسى افهم ليه اسمع كلام زى ده فى نفس ذات الوقت اللى بكون فعلا حاسه بحنين و افتقاد لناس كتييير ,, زى اما حد يعمل حاجه غلط بينه و بين ربنا و يقوم يسمع الآيه الكريمه " أما آن للذين آمنوا أن تخشع قلوبهم لذكر الله "طبعا حاشا لله انه يكون فى حاجه زى كلام ربنا سبحانه و تعالى ,, بس انا بحكى على فكرة الومضات القدريه او السينس او الستارزاللى بتظهر فى حياتنا فى اوقات غريبه ,, أيا كان بقى

عديت الاسامى .. ومحيت الاسامى

ونامى يا عينيى .. اذا راح فيك تنامى

وبعدو ها الحنين من خلف الحنين

بالدمع يغرقنى لاسامى المنسين

تاعرف لمين ومابعرف لمين

*******

طيب و اذا كانت عينى حتى لما بتنام بتحلم بالاسامى و أصحاب الأسامى ... وساعتها بعرف .. و دايما بحلم انى ببكى ,, و الله دايما بحلم انى ببكى على صداقه كانت فى وقت من الاوقات صداقه عمرى .. و دايما أحلم ان انا و صاحبتى بنتعاتب و بنصفى الخلاف اللى مكانش بينا أصلا ... بس بسببه مرت اكتر من سنه من غير مانتكلم و لاحتى نسأل على بعض ..........

انا ياخوفى لتكون بعدك حبى ... ومتهيا لى نسيتك وانته مخبا بقلبى

هو لما ببقى بتجنب التفكير تماما فى واقع اننا اصبحا اغراب عن بعض .. و كل ما تيجى السيرة مقولش غير مش عاوزة اكلم و مش عاوزة افتكر .. .. وبرده يفضل دايما صاحبى الحلم ده اللى بيدور حوالين انى فى بيتكم و معاكم و بنتكلم و نتصافى .. يبقى معنى كده انك لسه فى قلبى ؟؟؟ يعنى انا لسه فى عقلى الباطن مصرة انى منساش برغم انا بقالى حياه و اصحاب و دنيا تانيه .؟؟؟

طيب و ماله ..ما انا غصب عنى برده ..اصلى لو نسيت كل حاجه مش هعرف انسى يوم ماحصل خلاف بين عندنا و عندكو و جرينا انا و انتى على التليفون و اتفقنا انه مهما حصل بينهم ملناش دعوة و مش عاوزين نخسر بعض .. .. مش هعرف انسى بيتى و اهلى .. .. دا انا لو مكنتش عارفه اذاكر فى بيتنا .. احول عندك .. مليش دعوة انتى بتعملى ايه و لا فين ..ماهو انا فى بيتى بقى ..مش هنسى انه اى مناسبه تجمع العيله عندكو قرايبكم كانو بيسالوا عليا انا .. ماهم اتعودا يشوفونا مع بعض عندكو ولو مكنتش انا عندك يبقى انتى عندى او احنا الاتنين خرجنا ..... أصلى مش هعرف انسى عمر من عمرى

تاعرف لمين .. وما بعرف لمين

لكن انا خلاص بقيت عارفه .. و هفضل محافظه على الحنين ده فى مكان آمن فى قلبى ..ماهو محدش بينسى اصحاب عمره , و ان قدر لينا نتقابل فى يوم ونتكلم , هحكيلك على الكلام ده ..عشان انا عارفه ان عمرك ما هتقرأيه ..ما انا عارفه صاحبتى ,, عمرك ما كنتى غاويه قرايه .. انا دايما أقرأ و احكيلك .. و هحكيلك باذن الله.

Friday, March 9, 2007

ألف مبرووووك

السلام عليكم و رحمه الله و بركاته
طبعا انا ببارك ليا ..عشان أخيراً بقى عندى بلوووووج ( ببتسم جدا دلوقتى) طبعا لسه مش عارفه كل الاوبشن اللى هنا و بستكشف مع نفسى كده .. بس اللى عارفاه دلوقتى انى بقى عندى مساحه اكبر من الاول اكتب فيها عنى ... هكتب ايه ؟و ليه؟ مش عارفه دلوقتى ...هعرف فى حينه باذن الله
امممممممممممممممممم
يلا بقى سلام عليكم عشان مستعجله عاوزة اعمل ببليش و اشوف اول بوست هيكون شكله منور قد ايييهه.......